Klub reytinqində durum
Novator.az UEFA-nın klub reytinqinə nəzər salıb.
Çempionlar Liqası və Avropa Liqasının qrup mərhələlərinin ilk turundan sonra İspaniya reytinqdə birinci kürsünü qoruyur. Onu İngiltərə, Almaniya, İtaliya və Fransa izləyir.
Rusiya 6-cı, Ukrayna 10-cu, Türkiyə 11-ci, Belarus 24-cü, Qazaxıstan 25-ci, Azərbaycan 26-cı, Litva 34-cü, Ermənistan 36-cı, Latviya 37-ci, Moldova 41-ci, Gürcüstan 44-cü, Estoniya 51-ci yerdədir.
Sonuncu – 55-ci pillədə San Marino dayanır.
Klub reytinqi Çempionlar Liqası və Avropa Liqasında son beş mövsümdə qazanılan əmsala əsaslanır. Qrup raunduna qədər qələbə 1, heç-heçə 0,5 xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Azərbaycan bu mövsüm 2,375 əmsal qazanıb.
Ölkə UEFA-nın klub turnirlərinə 4 komanda ilə qatılıb. Qrup raundunadək “Qarabağ” gəlib çıxa bilib. Azərbaycan təmsilçisi Avropa Liqasının A qrupunda İspaniyanın “Sevilya”, Kiprin APOEL və Lüksemburqun “Düdelanj” komandaları ilə yarışır, hələlik xalsızdır.
Mövsümün əmsallar cədvəlinə Şotlandiya başçılıq edir: 5,250 əmsal.
