Təlim nöqtələrində
Müdafiə naziri Zakir Həsənov sentyabrın 18-də genişmiqyaslı təlimlərin komanda müşahidə məntəqələrindən birinə baş çəkib.
Mod.gov.az-ın məlumatına görə, qoşun növü və qisimlərinin komandanları, hərbi birlik və birləşmə komandirləri, digər vəzifəli şəxslərin məruzələrindən sonra ərazidə qüvvə və vasitələrin tətbiqi üzrə tapşırıqlar dəqiqləşdirilib.
Ərazinin kəşfi digər təlim nöqtələrində də aparılıb.
Müdafiə naziri səhra şəraitində ərazidə yaradılmış məntəqələr və müxtəlif poliqonlardakı təlim nöqtələrində olub, sərəncamların dəqiq icra olunması ilə bağlı müvafiq tapşırıqlar verib.
Sentyabrın 19-da yayılan başqa bir rəsmi məlumata əsasən, ərazinin kəşfi mərhələsindən sonra təlim iştirakçıları qoşunların qarşılıqlı fəaliyyətinin təşkilini maket üzərində həyata keçiriblər. Zakir Həsənovun rəhbərliyi ilə keçirilən müşavirədə təlimlərin mərhələlər üzrə epizodları çətin dağlıq relyefli ərazinin maketi üzərində işlənib.
Azərbaycan Ordusu genişmiqyaslı əməliyyat-taktiki təlimlərə sentyabrın 16-da başlayıb. Təlimlərə müxtəlif qoşun növləri, qisimləri, hərbi birlik və birləşmələr, 10 min nəfərədək şəxsi heyət, 100-dən çox tank və digər zirehli texnika, 120 müxtəlif çaplı raket və artilleriya qurğusu, reaktiv yaylım atəş sistemi və minaatanlar, 20-dək ordu və cəbhə aviasiyası və müxtəlif təyinatlı pilotsuz uçuş aparatları cəlb olunub.
Rəsmi açıqlamaya görə, təlimin mövzusu dağlarda əks-hücum əməliyyatının təşkili və keçirilməsi, düşmən qruplaşmasının darmadağın edilməsi məqsədilə qabaqlayıcı zərbələrin endirilməsi və azad edilmiş ərazilərdə əlverişli hədlərin tutulması üzrə fəaliyyətlərdir.
Bütün fəaliyyətlər döyüş atışlı mərhələlərdən ibarətdir.
