Jurnalistin cəzası azaldılıb
Bakı Apellyasiya Məhkəməsi Realliq.info saytının baş redaktoru İkram Rəhimovun şikayətinə baxışı tamamlayıb. Sentyabrın 18-də keçirilən prosesdə İkram Rəhimovun həbs cəzası 5 il 6 aydan 3 ilə endirilib.
İkram Rəhimova 5 il 6 aylıq azadlıqdan məhrumetmə cəzasını bu il iyunun 12-də Bakı Ağır Cinayətlər Məhkəməsi kəsmişdi. Jurnalist bir qrup şəxslə qabaqcadan əlbir olaraq hədə-qorxu ilə tələb etmədə, bu əməlin təkrar törədilməsində təqsirli bilinir.
Bakı Apellyasiya Məhkəməsində İkram Rəhimovun Bakı Ağır Cinayətlər Məhkəməsinin hökmündən verdiyi şikayətə avqustun 7-dən baxılırdı. İkram Rəhimov həmin gündən sentyabrın 5-dək Bakı İstintaq Təcridxanasında cinayət təqibinə son qoyulması tələbi ilə aclıq aksiyası keçirib.
Azadliq.org-un məlumatına görə, sentyabrın 18-i Bakı Apellyasiya Məhkəməsində çıxış edən İkram Rəhimov prezidentin ictimai-siyasi məsələlər üzrə köməkçisi Əli Həsənovu və Mətbuat Şurasını tənqid etdiyi üçün uydurma ittihamla təqib olunduğunu deyib, həbsdən buraxılmayacağı halda yenidən aclıq aksiyasına başlayacağını vurğulayıb.
İkram Rəhimovu 2018-ci il oktyabrın 26-da Dövlət Təhlükəsizliyi Xidməti həbs edib. Rəsmi məlumatda qeyd olunub ki, İkram Rəhimov tabeçiliyində olan şəxslərlə birlikdə Realliq.info və digər “reket” informasiya saytları yaradıb, həmin internet qəzetlərin jurnalistləri adı altında ayrı-ayrı vətəndaşların barəsində rüsvayedici və böhtan xarakterli məlumatları mətbu orqanlarında müntəzəm yayıb dayandırılması müqabilində pul tələb edərək alıb, bu üsulla müxtəlif idarə və təşkilatlarda çalışan şəxslərdən, sahibkarlardan müntəzəm haqq toplayıb.
