Hakimlərə cəzalar verilib
Sentyabrın 18-də Məhkəmə-Hüquq Şurasının iclası barədə rəsmi məlumat yayılıb. Xəbərə görə, iclasda intizam icraatlarına da baxılıb. Qanunvericiliyin tələblərinin kobud pozulmasına və korrupsiyaya şərait yaradan, süründürməçiliyə və digər neqativ hallara yol verən 6 hakimin intizam məsuliyyətinə cəlb edildiyi, Bərdə Rayon Məhkəməsinin hakimi Seyfəli Seyfullayevin başqa işə keçirilməsi barədə qərar çıxarıldığı vurğulanır.
Məhkəmə-Hüquq Şurası vakant hakim vəzifələrinə hakim olmayan namizədlərin seçilməsinin təşkili, hakimlərin fəaliyyətinin qiymətləndirilməsi, onların iş yerinin dəyişdirilməsi, vəzifədə irəli çəkilməsi, intizam məsuliyyətinə cəlb edilməsi funksiyalarını həyata keçirən orqandır. Ədliyyə naziri Fikrət Məmmədovun sədrlik etdiyi quruma Ramiz Rzayev (Ali Məhkəmənin sədri), Fuad Ələsgərov (Prezident Administrasiyasının şöbə müdiri), Ziyafət Əsgərov (Milli Məclis sədrinin birinci müavini) və başqa şəxslər daxildir.
