“Facebook” məzmuna müdaxilədən şikayət orqanı yaradır
“Facebook” sosial şəbəkəsi istifadəçinin yerləşdirdiyi materialın (yazı, foto, video və s.) çıxarılmasından şikayətlərə baxan, məzmunun (kontent) bərpası tələbini araşdıran müstəqil müşahidəçi orqanın tətbiqinə hazırlaşır. Novator.az-ın məlumatına görə, 2020-ci ildən fəaliyyətə başlayacaq orqanın işinə 40-a yaxın ekspert cəlb etmək planlaşdırılır.
Qrupun ilk üzvlərinin adları 2019-cu ilin sonuna qədər məlum ola bilər. Plana əsasən, şikayətlərə baxan ekspertlər 3 il müddətinə təyin olunacaqlar. Hər şikayətə 5 ekspertdən ibarət qrupun baxacağı vurğulanır.
Ekspertlərin çıxardığı qərarın məcburi olması nəzərdə tutulur. Ancaq “Facebook” rəhbərliyi materialın bərpasını qanun pozuntusu hesab edərsə, ekspertlərin qərarı nəzərə alınmayacaq.
2004-cü ildə yaradılan “Facebook”un qaydalarına əsasən, şəbəkə idarəçilərinin istifadəçinin yaydığı materialı silmək hüququ var.
Səidə Hüseynova
