Xarici ticarətin 8 ayı
Dövlət Gömrük Komitəsi 2019-cu ilin səkkiz ayı üzrə xarici ticarət statistikası yayıb. Novator.az bildirir ki, rəsmi hesabata görə, yanvar-avqust aylarında Azərbaycanın xarici ticarət əməliyyatlarının həcmi 22,9 milyard dollar olub, 13,5 milyard dollarlıq ixrac, 9,4 milyard dollarlıq idxal qeydə alınıb.
Səkkiz ayda 182 ölkə ilə ticarət əməliyyatı aparıldığı, gömrük orqanlarının büdcəyə 2 milyard 873,3 milyon manat ödədiyi vurğulanır.
Statistikaya əsasən, yanvar-avqust aylarında ixracın 5,9 faizi MDB ölkələrinin, 53,5 faizi Avropa İttifaqı ölkələrinin, 40,6 faizi digər ölkələrin payına düşüb.
İdxalda MDB-nin payı 22,5 faiz, Avropa İttifaqının payı 17,2 faiz, digər ölkələrin payı 60,3 faiz göstərilir.
Səkkiz ayda əsas tərəfdaş İtaliya olub. Bu ölkə ilə ticarət dövriyyənin 17,9 faizi həcmində rəsmiləşib.
İxracda əsas ölkə İtaliya (28,6 faiz), idxalda Rusiyadır (14,6 faiz).
İxracın 77,4 faizi xam neft və xam neft məhsulları, 2,5 faizi neft məhsulları, 10,5 faizi təbii qaz, 2,7 faizi meyvə-tərəvəz, 1 faizi plastmassa və ondan hazırlanan məmulatlar, idxalın 18,2 faizi maşın, mexanizm, elektrik aparatları, avadanlıqlar və onların hissələri, 10,6 faizi yeyinti məhsulları, 7,9 faizi nəqliyyat vasitələri və onların hissələri, 6,9 faizi qara metallar və onlardan hazırlanan məmulatlar, 2,8 faizi plastmassa və ondan hazırlanan məmulatlar, 1,9 faizi oduncaq və ondan hazırlanan məmulatlar, 1,8 faizi əczaçılıq məhsulları, 1,8 faizi geyim əşyaları və geyim üçün ləvazimat kimi rəsmiləşib.
