Bakı yarışı başladı
Bakıdakı Milli Gimnastika Arenasında dünya bədii gimnastika çempionatının təntənəli açılışı olub. Sentyabrın 16-da keçirilən mərasimə dövlət başçısı, Milli Olimpiya Komitəsinin prezidenti İlham Əliyev, birinci xanım, Azərbaycan Gimnastika Federasiyasının prezidenti Mehriban Əliyeva da qatılıb.
AZƏRTAC-ın məlumatına görə, açılış mərasimində çıxış edən gənclər və idman naziri Azad Rəhimov deyib ki, yarışın 2020-ci ildə Tokioda keçiriləcək Yay Olimpiya Oyunlarına təsnifat xarakteri daşıması, 61 ölkənin 300-dən çox idmançısının mükafatlar uğrunda mübarizə aparması dünya çempionatının gərgin mübarizə şəraitində keçəcəyinə, maraqlı və unudulmaz olacağına əminlik yaradır.
9 dəst medal uğrunda mübarizə aparılan dünya çempionatına Azərbaycan 9 gimnastla qatılıb.
Sentyabrın 22-dək davam edəcək çempionatda fərdi proqramda çoxnövçülük üzrə ilk 16-lıqda yer alan gimnastlar (bir ölkədən maksimum 2 gimnast olmaqla) Tokio olimpiadasına lisenziya əldə edəcəklər. Çoxnövçülük xalları üzrə 5 ən yaxşı komandanın olimpiadaya vəsiqə qazanacağı bildirilir.
