Müsavatçı cərimə edilib
Sentyabrın 13-də tutulan müsavatçı İlqar Mahmud səhəri gün Binəqədi Rayon Məhkəməsinin qərarı ilə 300 manat cərimə edilərək sərbəst buraxılıb.
İlqar Mahmud Müsavat Partiyası Laçın rayon təşkilatının üzvü, “Laçına qayıdış” hərəkatının fəallarındandır. O, sentyabrın 13-ü Bakı-Sumqayıt yolundakı ekologiya postunun yaxınlığında tutulub və polis bölməsinə gətirilib. Sonra Bakının Maştağa qəsəbəsinə aparılaraq narkoloji testdən keçirilib. Burada onun narkotik istifadə etdiyi barədə rəy verilib. İlqar Mahmud bu rəyin tam saxta olduğunu deyir.
Sentyabrın 14-ü Binəqədi Rayon Məhkəməsi İlqar Mahmudu İnzibati Xətalar Məcəlləsinin 206-cı maddəsi ilə (qanunsuz olaraq narkotik vasitələrin, psixotrop maddələrin istehlakı, satış məqsədi olmadan şəxsi istehlak miqdarında hazırlanması, əldə edilməsi, saxlanılması, daşınması və ya göndərilməsi) təqsirli bilinərək 300 manat cərimə edib.
Heç vaxt narkotik maddədən istifadə etmədiyini deyən İlqar Mahmud məhkəmə qərarının ədalətsiz olduğunu və buna görə apellyasiya instansiyasına şikayət verəcəyini bildirib.
İlqar Mahmud saxlanmasının və cərimə olunmasının həqiqi səbəbini bilmədiyini də söyləyib.
