Rusiyanın ixrac-idxal göstəriciləri
Rusiyanın Federal Gömrük Xidməti 2019-cu ilin yeddi ayı üzrə xarici ticarət göstəricilərini açıqlayıb. Novator.az-ın məlumatına görə, yanvar-iyul aylarının xarici ticarət dövriyyəsi 377,3 milyard dollar göstərilir.
Hesabata əsasən, 7 ayda ixrac 3,2% azalaraq 241,1 milyard dollara, idxal 0,7% azalaraq 136,2 milyard dollara düşüb.
Xarici ticarətdə 105 milyard dollara yaxın müsbət saldo qeydə alındığı vurğulanır.
İxracda yanacaq-energetika kompleksinin payı 64,2%-dir.
Yeddi ayda Rusiyanın əsas xarici ticarət tərəfdaşı Çin olub. Yanvar-iyul aylarında Rusiyanın bu ölkə ilə xarici ticarət dövriyyəsi 60 milyard dollar təşkil edib. Sonrakı yerlərdə Almaniya (30,2 milyard dollar), Niderland (30 milyard dollar), ABŞ (15,3 milyard dollar), Cənubi Koreya (14,6 milyard dollar), İtaliya, Türkiyə (hər ikisi 14,3 milyard dollar), Yaponiya (11,4 milyard dollar), Polşa (9,3 milyard dollar) və Finlandiya (8 milyard dollar) gəlir.
Səidə Hüseynova
