Müsavatın qurultayı: yekun qərara hazırlıq görülür
Müsavat Partiyasının 9-cu qurultayına hazırlıq davam edir. Sentyabrın 10-da Novator.az-a danışan Müsavat başqanının müavini, qurultayın təşkilat komitəsinin sədri Gülağa Aslanlı deyib ki, tədbirlər partiya nizamnaməsi və müvafiq təlimatlar əsasında aparılır: “50 yerli təşkilatda keçirilmiş yığıncaq və ya konfransda qurultaya nümayəndələr seçilib. 10-dan artıq təşkilatda yığıncaqların keçirilməsi üçün işlər görülüb və bu prosesi sentyabr ayının sonunadək başa çatdırmaq planlaşdırılır. Qurultayda 400-dən çox nümayəndənin iştirakı gözlənir”.
Gülağa Aslanlı əlavə edib ki, yerli təşkilatların yığıncaqlarına böyük maneələr törədilib: “Demək olar ki, bütün rayonlarda yığıncaqlar polisin nəzarəti altında keçirilib. Bəzi rayonlarda isə polisin birbaşa müdaxiləsi ilə üzləşmişik. Amma çətinliklərə baxmayaraq yığıncaqlarımızı keçirməyə nail olduq”.
Müsavat Məclisinin 20 iyul 2019-cu il iclasında 9-cu qurultayın oktyabr ayında keçirilməsi barədə qərar çıxarılıb. Qurultay gününü müəyyən etmək Divana həvalə olunub. Yekun qərarın Divanın növbəti toplantısında elan edilməsi razılaşdırılıb. Həmin toplantı sentyabrın 16-da keçirilməlidir.
Gülağa Aslanlının sözlərinə görə, partiyanın nizamnamə və proqramına əlavə və dəyişikliklər komissiyasına daxil olan təkliflər üzərində də iş davam edir.
Partiya nizamnaməsinə əsasən, qurultay Müsavatın ali orqanıdır, 4 ildən bir Məclisin qərarı ilə çağırılır.
Qurultayın partiyanın proqramını və nizamnaməsini qəbul etmək, onlarda dəyişiklik və əlavələr etmək, Məclisin rayon (şəhər) təşkilatı sədri olmayan üzvlərini, partiyanın başqanını və Mərkəzi Nəzarət-Təftiş Komissiyasını seçmək səlahiyyətləri var.
Müsavat Partiyası 1911-ci ildə yaradılıb. Partiyanın ilk başqanı Məhəmməd Əmin Rəsulzadə, ikinci başqanı Mirzə Bala Məmmədzadə, üçüncü başqanı Kərim Odər, dördüncü başqanı Məhəmməd Azər Aran olub.
Sovet hakimiyyəti illərində mühacirətdə fəaliyyət göstərən partiya 1992-ci ildə Bakıda keçirilən 3-cü qurultayda bərpa olunub, İsa Qəmbər başqan seçilib. Partiyanın 1995, 1997, 2001 və 2006-cı illərdə keçirilən qurultayları İsa Qəmbəri başqan postunda saxlayıb.
2014-cü ilin sentyabrında keçirilən 8-ci qurultayda başqan vəzifəsinə Arif Hacılı seçilib.
