Adil İsmayılovun vəkillik fəaliyyəti dayandırılıb
Adil İsmayılovun vəkillik fəaliyyəti bir il müddətinə dayandırılıb.
Qərar intizam icraatı çərçivəsində, Vəkillər Kollegiyası Rəyasət Heyətinin sentyabrın 9-da keçirilən iclasında qəbul edilib.
Kollegiya intizam icraatının səbəbini hələ açıqlamayıb.
Qurumdan “Azadlıq” radiosuna deyiblər ki, Vəkillər Kollegiyası bununla bağlı şərh vermir: “Əgər istəyirsə, haqqında tədbir görülən vəkil bu barədə açıqlama verə bilər”.
Adil İsmayılov hələlik məsələyə aydınlıq gətirməyib. O, “Facebook” şəbəkəsində yazıb ki, baş verənlərlə bağlı Vəkillər Kollegiyasının sədri Anar Bağırovun rəsmi açıqlamasını gözləyir: “Ondan sonra mən də məsələyə münasibət bildirəcəm”.
Gununsesi.org-un məlumatına görə, intizam icraatına kollegiyanın üzvü Sahil Quliyevin şikayəti səbəb olub. Sahil Quliyev ərizəsində Adil İsmayılovun onu təhqir etdiyini göstərib. Saytın xəbərində Adil İsmayılovun bu ittihamla razılaşmadığı da vurğulanır.
Adil İsmayılov “Adil İsmayılov və partnyorları” vəkil bürosunda çalışır. O, 30 ilə yaxındır vəkillik fəaliyyəti ilə məşğuldur.
