Klubların reytinqi
UEFA-nın klub reytinqi Çempionlar Liqası və Avropa Liqasında son beş mövsümdə qazanılan əmsala əsaslanır. Qrup raunduna qədər qələbə 1, heç-heçə 0,5 xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Novator.az bildirir ki, hər bir klub üçün ayrıca reytinq də tərtib olunur.
Avropa Liqasının ilkin raundunda ələnən klub 0,5 xal, birinci raundunda ələnən klub 1 xal, ikinci raundunda ələnən klub 1,5 xal, üçüncü raundunda ələnən klub 2 xal, dördüncü raundunda ələnən klub 2,5 xal alır.
Qrupda mərhələsi və sonrakı raundlarda qələbə 2 xal, heç-heçə 1 xaldır.
Çempionlar Liqasının qrupuna düşmək 4 bonus xalı, Avropa Liqasının qrupuna düşmək 3 bonus xalı gətirir.
Çempionlar Liqasının 1/8 finalına çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Hazırda klub reytinqinə Madrid “Real”ı başçılıq edir: 121,000 xal.
İspaniyanın digər klublarından “Atletiko” 109,000 xalla ikinci, “Barselona” 108,000 xalla üçüncüdür.
Almaniyanın “Bavariya” klubunun 104,000, İtaliyanın “Yuventus” klubunun 99,000 xalı var.
Avropa Liqasında Azərbaycanın “Qarabağ” klubu ilə eyni qrupda oynayacaq “Sevilya” (İspaniya) 79,000 xalla 11-ci yerdə qərar tutub.
Ağdamlıların qrupdakı digər rəqiblərindən Kipr APOEL-i 23,500 xalla 58-cidir, “Düdelanj” (Lüksemburq) 8,250 xalla 137-cidir.
“Qarabağ” 20,000 xalla 70-ci yerdə göstərilir.
