“Şimal-2” elektrik stansiyası açılıb
Prezident İlham Əliyev sentyabrın 5-i Bakıda “Şimal-2” elektrik stansiyasının istismara verilməsi mərasimində iştirak edib. Xəbəri AZƏRTAC yayıb.
Arayışa görə, 1950-ci illərdə iki mərhələdə istifadəyə verilən “Şimal” Elektrik Stansiyasının 1988-ci ildə birinci, 1998-ci ildə ikinci növbəsi köhnəldiyi üçün istismardan çıxarılıb.
2000-ci ildə əsası qoyulan 400 meqavatlıq “Şimal-1” stansiyası 2002-ci ildə istismara verilib. 2011-ci ildə ərazisi 104,9 hektar, gücü 400 meqavatlıq “Şimal-2” Elektrik Stansiyasının təməli qoyulub. 2019-cu ildə tikinti və quraşdırma prosesi tamamlanıb.
“Şimal-1” və “Şimal-2” elektrik stansiyalarının birlikdə il ərzində gözlənilən istehsalı 5,7 milyard kilovat-saatdır. Stansiyalar birlikdə ölkə üzrə elektrik enerjisi istehsalının 20 faizini, Bakı və Abşeron yarımadası üzrə 40-50 faizini təşkil edəcək.
“Şimal-2”nin kollektivinə uğurlar arzulayan prezident İlham Əliyev deyib: “Azərbaycanda elektrik enerjisinə tələbat artır və istehsal gücləri bu tələbata uyğun olmalıdır. Ona görə bu stansiyanın çox böyük əhəmiyyəti var. Azərbaycanda bundan sonra da sənaye istehsalının və iqtisadiyyatın artımı elektrik enerjisi mənbələri ilə təmin edilməlidir”.
