İkram Rəhimov aclığı dayandırıb
Ədliyyə Nazirliyinin Penitensiar Xidməti Realliq.info saytının həbsdə olan baş redaktoru İkram Rəhimovun aclıq aksiyasını dayandırdığını açıqlayıb.
Sentyabrın 5-də qurumun ictimaiyyətlə əlaqələr şöbəsindən “Report”a bildirilib ki, İkram Rəhimov aclıq aksiyasını dayandırıb və qida qəbuluna başlayıb: “Onun səhhəti ilə bağlı hər hansısa bir problem yoxdur”.
İkram Rəhimov avqustun 7-dən saxlandığı Bakı İstintaq Təcridxanasında aclıq edirdi.
İkram Rəhimovu 2018-ci il oktyabrın 26-da Dövlət Təhlükəsizliyi Xidməti həbs edib. Rəsmi məlumatda qeyd olunub ki, İkram Rəhimov tabeçiliyində olan şəxslərlə birlikdə Realliq.info və digər “reket” informasiya saytları yaradıb, həmin internet qəzetlərin jurnalistləri adı altında ayrı-ayrı vətəndaşların barəsində rüsvayedici və böhtan xarakterli məlumatları mətbu orqanlarında müntəzəm yayıb dayandırılması müqabilində pul tələb edərək alıb, bu üsulla müxtəlif idarə və təşkilatlarda çalışan şəxslərdən, sahibkarlardan müntəzəm haqq toplayıb.
2019-cu il iyunun 12-də Bakı Ağır Cinayətlər Məhkəməsi İkram Rəhimovu 5 il 6 ay müddətinə azadlıqdan məhrum edib. Jurnalist bir qrup şəxslə qabaqcadan əlbir olaraq hədə-qorxu ilə tələb etmədə, bu əməlin təkrar törədilməsində təqsirli bilinib.
Avqustun 7-dən Bakı Apellyasiya Məhkəməsində İkram Rəhimovun Bakı Ağır Cinayətlər Məhkəməsinin hökmündən verdiyi şikayətə baxılır.
