Avropa Məhkəməsi Azərbaycanı 100 min avroya yaxın cərimələdi
Sentyabrın 5-də Avropa İnsan Hüquqları Məhkəməsi Azərbaycandan göndərilən 15 şikayət üzrə qərarını elan edib.
Media Hüququ İnstitutundan “Azadlıq” radiosuna verilən məlumata görə, 15 şikayətin ümumilikdə 13 müəllifi var. Onlar əsasən müxalif partiya təmsilçiləri və ictimai-siyasi fəallardır.
Ərizəçilər 2009-2015-ci illərdə müxtəlif aksiyalarda tutularaq inzibati qaydada cəzalandırılmış şəxslərdir. Avropa Məhkəməsi hesab edir ki, ərizəçilərin azadlıq və toxunulmazlıq, ədalətli məhkəmə araşdırması və birləşmək azadlığı hüquqları pozulub. Buna görə də məhkəmə Azərbaycan dövlətinin həmin şəxslərə təzminat ödəməsi barədə qərar çıxarıb.
Qərara əsasən, ərizəçilərdən Ruslan Nəsirliyə 14 min, Türkel Alışov və Saqif Qurbanovun hər birinə 11 min, Rafiq Cəlilova 9 min 200, Elçin Həsənov və Nazim Abbaslının hər birinə 9 min, Rasim Rzayevə 7 min 270, Vüqar Rzayevə 7 min 200, İslam Həsənov və Mübariz Əbdülkərimovun hər birinə 5 min 750, Rauf Əbdülrəhmanlı və Əli Abdullayevin hər birinə 5 min 500 avro təzminat ödənməlidir.
Ərizəçilərdən yalnız Fuad Hacıyevə təzminat ödənməyəcək, çünki o, maddi tələb irəli sürməyib. Avropa Məhkəməsi Fuad Hacıyevin birləşmək hüququnun pozulduğunu tanıyıb.
