Təhsil Nazirliyi: İctimai Şuraya seçki keçirilib
Sentyabrın 4-ü Bakıda, Azərbaycan-Fransız Universitetinin akt zalında Təhsil Nazirliyi yanında İctimai Şuraya seçki keçirilib.
Rəsmi məlumata görə, nazirlik İctimai Şuraya namizədlik və seçici qismində iştirakla bağlı 125-dən çox müraciət alıb. 44 seçici və 34 namizəd rəsmi qeydiyyata alınıb. Həmin müraciətlər Təhsil Nazirliyinin və vətəndaş cəmiyyəti institutlarının nümayəndələrindən təşkil olunmuş Seçki Komissiyasında yoxlanıb.
Səsvermənin nəticəsinə əsasən, İlqar Orucov, Şahlar Əsgərov, Etibar Əliyev, Nadir İsrafilov, Ülviyyə Mikayılova, Elmina Kazımzadə, Anar Vəliyev, Anar Cəfərzadə, Asif Cahangirov, Mais Əliyev və Hikmət Əlizadə İctimai Şura üzvü olublar.
İctimai Şura təhsil naziri Ceyhun Bayramovun 11 iyul 2019-cu il əmrinə əsasən yaradılıb. Əsas məqsədin nazirliyin fəaliyyətində şəffaflığı artırmaq, eyni zamanda təhsil sahəsində ictimaiyyətlə qarşılıqlı fəaliyyəti gücləndirmək olduğu bəyan edilib.
