Ordu generalı ilə müzakirələr
Prezident İlham Əliyev sentyabrın 3-ü Bakıda Rusiya Təhlükəsizlik Şurasının katibi Nikolay Patruşevin başçılıq etdiyi nümayəndə heyəti ilə bir araya gəlib. AZƏRTAC-ın məlumatına görə, görüşdə Azərbaycanla Rusiya arasında münasibətlərin siyasi, iqtisadi, təhlükəsizlik və digər sahələrdə uğurla inkişaf etdiyi qeyd olunub, Nikolay Patruşevin rəhbərlik etdiyi nümayəndə heyətinin səfəri zamanı ekstremizmə, terrorçuluğa qarşı mübarizə ilə bağlı qanunvericilik və əməkdaşlıq məsələlərinin müzakirə ediləcəyi vurğulanıb.
68 yaşlı Nikolay Patruşev ordu generalı, Rusiya Qəhrəmanıdır. 1975-ci ildən xüsusi xidmət orqanlarında qulluq edib. 1999-2008-ci illərdə Federal Təhlükəsizlik Xidmətinin rəisi olub. 2008-ci ildən Təhlükəsizlik Şurasının katibidir.
Novator.az bildirir ki, Nikolay Patruşevin 3 sentyabr görüşündə Azərbaycan Təhlükəsizlik Şurasının katibi Ramil Usubov da iştirak edib.
General-polkovnik Ramil Usubov bu il iyunun 20-də daxili işlər naziri vəzifəsindən azad edilərək Təhlükəsizlik Şurasının katibi təyin olunub. 1948-ci il təvəllüdlü Ramil Usubov 29 aprel 1994-cü ildən daxili işlər naziri idi.
Təhlükəsizlik Şurasının tarixi 28 il əvvələ gedib çıxır. 1991-ci il mayın 14-də prezident Ayaz Mütəllibovun başçılığı ilə Milli Təhlükəsizlik Şurası yaradılıb. Prezident fərmanında Milli Təhlükəsizlik Şurasına respublikanın müdafiəsi, onun bütövlüyünün qorunması siyasətinin həyata keçirilməsinə, iqtisadi və ekoloji təhlükəsizliyinin təmin edilməsinə, eləcə də fövqəladə hadisələrin nəticələrinin aradan qaldırılmasına dair tövsiyələr hazırlamaq həvalə olunub.
1992-ci ildə Ayaz Mütəllibov hakimiyyətdən gedəndən sonra Milli Təhlükəsizlik Şurası fəaliyyət göstərməyib.
1997-ci il aprelin 10-da prezident Heydər Əliyevin fərmanı ilə Təhlükəsizlik Şurası yaradılıb. Prezident yanında məşvərətçi orqan kimi qurulan Təhlükəsizlik Şurasına vətəndaşların hüquq və azadlıqlarının, Azərbaycanın müstəqilliyinin və ərazi bütövlüyünün qorunması sahəsində prezidentə yardımçılıq həvalə olunub.
20 iyun 2019-cu ilə qədər şuranın katibi funksiyalarını Prezident Administrasiyasının rəhbəri yerinə yetirib.
