Milyarderlər 8 aya nə qədər qazanıblar?
Rusiyanın ən varlı 24 milyarderi bu ilin səkkiz ayında (yanvar-avqust ayları) ümumilikdə 28 milyard 316 milyon dollar pul qazanıb.
Novator.az xəbər verir ki, hesablamanı “RİA Novosti” agentliyi “Bloomberq”in tərtib etdiyi reytinqə əsaslanaraq aparıb. Meyar kimi milyarderlərə məxsus şirkətlərin səhmlərinin dəyəri götürülüb.
Rusiyanın ən varlı adamı “Norilski nikel” şirkətinin prezidenti Vladimir Potanindir. Onun var-dövləti ilin əvvəlindən 3,88 milyard dollar artaraq 23,5 milyard dollara çatıb.
Ən varlı adamların siyahısında ikinci yerdə “Novatek” qaz şirkətinin idarə heyətinin sədri Leonid Mixelson gəlir. 2019-cu ilin yanvar-avqust aylarında onun varidatı 2,85 milyard dollar artaraq 22,3 milyard dollar olub.
Metallurgiya, nəqliyyat sahəsi üzrə biznesmen Vladimir Lisin varlılar siyahısında üçüncü yerdədir. Səkkiz ayda onun var-dövləti 2,64 milyard dollar artaraq 20,5 milyard dollara çatıb.
Dördüncü pillədə “Severstal”ın əsas səhmdarı, qara metallurgiya və maşınqayırma üzrə biznesmen Aleksey Mordaşov qərarlaşıb. Onun var-dövləti 1,35 milyard dollar çoxalıb, 18,8 milyard dollar olub.
“Lukoyl” neft şirkətinin prezidenti Vahid Ələkbərov Rusiyanın ən varlı adamları cərgəsində beşinci yerdədir. Bu ilin yanvar-avqust aylarında onun varidatı 2,13 milyard dollar artıb. Hazırda Vahid Ələkbərov 18,2 milyard dollarlıq var-dövlətə sahibdir.
Səidə Hüseynova
