Gürcüstanın baş naziri niyə istefa verib?
Sentyabrın 2-də Gürcüstanın baş naziri Mamuka Baxtadze istefa verib. Novator.az-ın məlumatına görə, o, istefasını missiyasının başa çatması ilə əsaslandırıb.
Mamuka Baxtadze 2018-ci ilin iyun ayından baş nazir idi. 1982-ci il təvəllüdlü Mamuka Baxtadze Tbilisi Dövlət Universitetinin, Gürcüstan Texniki Universitetinin, Moskva Dövlət Universitetinin və Fransa Biznes Məktəbinin məzunudur. Baş nazir olmazdan əvvəl maliyyə naziri postunu tutub.
2 sentyabr açıqlamasında Mamuka Baxtadze qeyd edib ki, baş nazir postuna gələrkən əsas missiyası ölkənin strateji inkişafının istiqamətlərinin müəyyənləşməsi olub və bu vəzifənin öhdəsindən gələ bilib. Mamuka Baxtadze deyib ki, ölkənin tam konsolidasiyaya böyük ehtiyacı var və bu, bütün uğurların açarıdır.
Gürcüstanda hökuməti 150 yerlik parlamentə azı 76 mandat əldə edən partiya formalaşdırır. 2016-cı ilin oktyabrında keçirilmiş son parlament seçkisində Gürcü Arzusu – Demokratik Gürcüstan Partiyası çoxluq əldə edib. 2012-ci ildə qurulmuş partiya həmin ilin oktyabr ayından hakimiyyətdədir.
