“Qarabağ”lı 48
UEFA Avropa Liqasının son ələmə raundu arxada qalıb. Novator.az-ın məlumatına görə, Azərbaycan təmsilçisi “Qarabağ” avqustun 29-u Bakıda Şimali İrlandiyanın “Linfild” komandasını 2:1 hesabı ilə yenərək qrup mərhələsinə vəsiqə qazanıb. İlk oyunda britaniyalılar üstün gəlmişdi – 3:2.
Qrup raundunda oynayacaq 48 komandadan 8-i əvvəllər Avropa Liqasının qalibi olub. 1971-ci ildən keçirilən, 2008-ci ilədək UEFA kuboku adlanmış turnirdə “Sevilya” 5, “Feyenoord”, “Borussiya” (Mönhenqladbah), “Portu” 2, PSV, “Ayntraxt” (Frankfurt), SSKA (Moskva), “Mançester Yunayted” 1 uğur əldə edib. Titullu komandaların (“Feyenoord” istisna olunmaqla) qrup mərhələsində “Qarabağ”a rəqib olmaq ehtimalı var. Püşk avqustun 30-da atılacaq.
Azərbaycan bu mövsüm UEFA-nın klub turnirlərinə 4 komanda ilə qatılıb.
“Səbail”i Avropa Liqasının birinci mərhələsində Rumıniyanın “Universitatya” komandası ələyib. Bakılılar hər iki oyunda 2:3 hesabı ilə uduzublar.
“Qəbələ” həmin turnirə ikinci raunddan qoşulub və Gürcüstan paytaxtının “Dinamo” klubuna yenilib (0:2, 0:3).
“Neftçi” Avropa Liqasının birinci mərhələsində Moldovanın “Speranta” klubunu (6:0, 3:0), ikinci mərhələsində Rusiyanın “Arsenal” (Tula) klubunu (3:0, 1:0) turnirdən kənarlaşdırıb, üçüncü mərhələdə İsrailin “Bney Yehuda” klubuna uduzub (2:2, 1:2).
Çempionlar Liqasında Azərbaycanı təmsil edən “Qarabağ” komandası birinci raundda Albaniyanın “Partizani” klubunu (2:0, 0:0), ikinci raundda İrlandiyanın “Dandolk” klubunu (3:0, 1:1) yenib, üçüncü raundda Kiprin APOEL klubuna məğlub olaraq (0:2, 2:1) Avropa Liqasına köç edib.
