Problemli kreditlər nə qədər azalıb?
Mərkəzi Bank yeni hesabatlar açıqlayıb. Novator.az bildirir ki, rəsmi məlumata görə, avqustun 1-nə kreditlərin məbləği 13 milyard 342,3 milyon manat, əmanətlərin həcmi 8 milyard 580 milyon manat həddində olub.
Başqa bir hesabata əsasən, avqustun 1-nə 1 milyard 487,4 milyon manatlıq ödəniş vaxtı keçmiş kredit qeydə alınıb. İlin əvvəli ilə müqayisədə problemli kreditlərin həcmi 97,6 milyon manat azalıb.
Yanvarın 1-nə problemli kreditlər 1 milyard 585 milyon manat, fevralın 1-nə 1 milyard 569,4 milyon manat, martın 1-nə 1 milyard 574,7 milyon manat, aprelin 1-nə 1 milyard 558 milyon manat, mayın 1-nə 1 milyard 503,8 milyon manat, iyunun 1-nə 1 milyard 494,3 milyon manat, iyulun 1-nə 1 milyard 486,5 milyon manat həddində göstərilib.
Prezident İlham Əliyevin 28 fevral 2019-cu il fərmanı fiziki şəxslərlə 2012-ci il yanvarın 1-dən bağlanmış kredit müqavilələri üzrə gecikən borclar üçün devalvasiya kompensasiyaları nəzərdə tutub.
2015-ci il fevralın 21-də Mərkəzi Bank dolların rəsmi kursunu 0,7862 manatdan 1,05 manata qaldırıb. Dekabrın 21-də Mərkəzi Bank ikinci devalvasiyaya qərar verib, rəsmi kurs 1,55 manat olub. Hazırda 1 dollar 1,7 manata təklif edilir.
28 fevral fərmanına əsasən, 2015-ci il fevralın 21-nə xarici valyutada olan əsas kredit borcu üzrə 1 ABŞ dollarına 25 qəpik, həmin il dekabrın 21-nə xarici valyutada əsas kredit borcu üzrə 1 ABŞ dollarına 60 qəpik kompensasiya ödənib.
