Siyasi məhbus: yeni siyahı yayılacaq
Avqustun 29-da jurnalist Seymur Həzi 5 illik həbs cəzasını başa vuraraq azadlığa buraxılıb.
1982-ci il təvəllüdlü Seymur Həzi AXCP üzvü, 2016-cı ildə nəşri dayanmış “Azadlıq” qəzetinin əməkdaşıdır. Bəzi yerli və xarici hüquq müdafiəçiləri onu siyasi məhbus sayırdı. 2018-ci ildə Avropa İnsan Hüquqları Məhkəməsi Seymur Həzinin azadlıq və toxunulmazlıq hüququnun pozulduğunu tanıyıb, Azərbaycan dövlətinin ona 14 min 500 avro təzminat ödəməsi barədə qərar çıxarıb.
Novator.az-ın məlumatına görə, İntiqam Əliyev, Xədicə İsmayıl, Anar Məmmədli, Xalid Ağalıyev, Rövşən Hacıbəyli və başqalarının təmsil olunduğu Siyasi Məhbusların Vahid Siyahısı üzrə İşçi Qrup bu yaxınlarda yeni siyahı açıqlayacaq. Hazırda bu qurum 70-ə yaxın şəxsi siyasi məhbus sayır. Onların 4-ü jurnalist (Araz Quliyev, Elçin İsmayıllı, Əfqan Muxtarlı, Ziya Əsədli), 1-i (Əliabbas Rüstəmov) hüquq müdafiəçisidir.
Siyasi və ictimai fəallardan 6 nəfər həbsdədir: Asif Yusifli, Fuad Əhmədli, Orxan Baxışlı, Saleh Rüstəmov, Aqil Məhərrəmov, Babək Həsənov.
Siyahının inanclı fəallar bölümündə Taleh Bağırov, Abbas Hüseynov, Məhəmmədəli Axundzadə, Dəyanət Səmədov, Firdovsi Məmmədrzayev, Mövsüm Səmədov, Rufulla Axundzadə, Fəramiz Abbasov, Abgül Süleymanov və başqa şəxslər yer alır.
Avropa Şurasının meyarlarına görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
