Seymur Həzi: “Böyük həbsxanadan kiçik həbsxanaya…”
“Beş il qabaq mənə verilmiş ittihama da, barəmdə çıxarılan məhkəmə hökmünə də münasibətim dəyişməyib. İttiham qərəzli, məhkəmə hökmü ədalətsiz idi”. Avqustun 29-u 5 illik həbs cəzasını başa vuraraq azadlığa çıxan jurnalist Seymur Həzi “Azadlıq” radiosuna açıqlamasında belə deyib.
O bildirib ki, həbsdə idmanla məşğul olub, çoxlu kitab oxuyub: “Yəni bu 5 il həyatımdan heç nə çala bilmədi, əksinə, həyatıma bəzi müsbətləri əlavə etdi”.
Seymur Həzi hesab edir ki, onun həbsi hökumətin media tənqidinə dözümsüzlüyünün göstəricisi idi: “Bununla hökumət göstərdi ki, tənqidə açıq deyil, tənqidə görə cəzalandırma yolu tutub”.
Jurnalistin sözlərinə görə, həbsdə olduğu 5 ildə azadlığa çıxmaq haqqında düşünməyib və hakimiyyətdən bağışlanma gözləməyib.
Meydan.tv-yə açıqlamasında Seymur Həzi deyib ki, azadlıqda həbsdəkindən elə bir fərqli hiss keçirmir: “Adətən həbsdən azad olunanlar kiçik həbsxanadan böyük həbsxanaya çıxdıqlarını deyirlər, mən əksini düşünürəm: böyük həbsxanadan kiçik həbsxanaya çıxmışam”.
Novator.az bildirir ki, 1982-ci il təvəllüdlü Seymur Həzi BDU-nun şərqşünaslıq fakültəsini (bakalavr və magistr dərəcələri ilə) və AMEA-nın Fəlsəfə İnstitutunun aspiranturasını bitirib.
AXCP üzvü, “Azadlıq” qəzetinin əməkdaşı olan Seymur Həzi 2014-cü il avqustun 29-da tutulub, bir nəfərə xəsarət yetirməkdə ittiham olunaraq 5 il müddətinə azadlıqdan məhrum edilib. Onun cəza müddəti 2019-cu il avqustun 29-da başa çatıb. Həmin gün o, Bakıdakı 17 saylı Cəzaçəkmə Müəssisəsindən azadlığa buraxılıb.
2018-ci ildə Avropa İnsan Hüquqları Məhkəməsi Seymur Həzinin azadlıq və toxunulmazlıq hüququnun pozulduğunu tanıyıb, Azərbaycan dövlətinin ona 14 min 500 avro təzminat ödəməsi barədə qərar çıxarıb.
Seymur Həzi həbsdə olarkən, 2016-cı ilin avqustunda müxalif siyasətçi Tofiq Yaqublunun qızı Nigarla ailə qurub.
