Lap az qaldı
Məhbus jurnalist Seymur Həzinin həyat yoldaşı Nigar Həzi Bakıdakı 17 saylı Cəzaçəkmə Müəssisəsinin qarşısında çəkilmiş fotosunu yayıb. Novator.az-ın məlumatına görə, avqustun 26-sı özünün “Facebook” səhifəsində yaydığı fotoya Nigar Həzi bu sözləri əlavə edib: “Ümid edirəm həbsxanaya sonuncu gəlişim olar. Avqustun 29-da özləri evə gətirərlər”.
Nigar müxalif siyasətçi Tofiq Yaqublunun qızıdır. O, məhbus jurnalistlə 2016-cı ilin avqustunda ailə qurub. Nikah mərasimi həbsxanada keçirilib.
Seymur Həzi bu həftə azadlığa buraxılmalıdır.
1982-ci il təvəllüdlü Seymur Həzi BDU-nun şərqşünaslıq fakültəsini (bakalavr və magistr dərəcələri ilə) və AMEA-nın Fəlsəfə İnstitutunun aspiranturasını bitirib.
2000-ci ildən AXCP-nin üzvüdür, “Azadlıq” qəzetinin aparıcı əməkdaşlarından olub.
Seymur Həzi 2014-cü il avqustun 29-da tutulub. Bir nəfərə xəsarət yetirməkdə ittiham olunan jurnalist Abşeron Rayon Məhkəməsinin hökmü ilə 5 il müddətinə azadlıqdan məhrum edilib. Jurnalist ittihamı rədd edir və hakimiyyəti tənqid edən yazılarına, çıxışlarına görə həbs olunduğunu bildirir.
2018-ci il dekabrın 6-da Avropa İnsan Hüquqları Məhkəməsi Seymur Həzinin azadlıq və toxunulmazlıq hüququnun pozulduğunu tanıyıb, Azərbaycan dövlətinin ona 14 min 500 avro təzminat ödəməsi barədə qərar çıxarıb.
