Bakının makroiqtisadi göstəriciləri
Bakı Şəhər Statistika İdarəsi paytaxtın yarım illik makroiqtisadi göstəricilərini açıqlayıb. Novator.az bildirir ki, rəsmi hesabata görə, sənaye müəssisələri və fərdi sahibkarlar 2019-cu ilin yanvar-iyun aylarında 19,9 milyard manatlıq və ya əvvəlki ilin ilk yarısı ilə müqayisədə 0,7 faiz çox sənaye məhsulu istehsal edib.
Yarım ildə əsas kapitala 3 milyard 917,2 milyon manat məbləğində, yaxud 2018-ci ilin yanvar-iyun ayları ilə müqayisədə 12,3 faiz az vəsait yönəldildiyi vurğulanır.
Hesabata əsasən, yanvar-iyun aylarında istehlak məhsulları və xidmətlər 2018-ci ilin müvafiq dövrü ilə müqayisədə 2,9 faiz, o cümlədən ərzaq məhsulları, içkilər və tütün məmulatları 2,2 faiz, qeyri-ərzaq məhsulları 1,5 faiz , əhaliyə göstərilən xidmətlər 4,6 faiz bahalaşıb.
Ticarət dövriyyəsinin həcminin 3 faiz, iaşə dövriyyəsinin real ifadədə 4,4 faiz, əhaliyə göstərilən ödənişli xidmətlərin dəyərinin real ifadədə 1,5 faiz artdığı qeyd olunur.
2019-cu yanvar-may aylarında işçilərin orta aylıq nominal əməkhaqqının 3,9 faiz artaraq 821,4 manata çatdığı bildirilir.
