Qərargahda qəza müşavirəsi
Müdafiə Nazirliyinin rəhbərliyi, aidiyyəti qurumların və xidmətlərin nümayəndələri iyulun 25-də təyyarə qəzasının səbəblərinin araşdırılması və müvafiq tədbirlərin həyata keçirilməsi məqsədilə yaradılmış əməliyyat qərargahına baş çəkib.
Azərbaycan Hərbi Hava Qüvvələrinin MiQ-29 təyyarəsi iyulun 24-ü saat 22:00 radələrində təlim-məşq uçuşu zamanı qəzaya uğrayaraq Xəzər dənizinə düşüb.
Mod.gov.az-ın məlumatına görə, əməliyyat qərargahında müdafiə naziri general-polkovnik Zakir Həsənovun rəhbərliyi ilə xidməti müşavirə keçirilib. Nazir digər dövlət qurumları ilə qarşılıqlı fəaliyyətin davam etdirilməsi barədə göstəriş verib.
İyulun 25-də Hərbi Prokurorluq Cinayət Məcəlləsinin 342.2-ci maddəsi ilə cinayət işi başlayıb, istintaq qrupu yaradıb. Cinayət Məcəlləsinin 342-ci maddəsi qulluğa səhlənkar yanaşmaya görə məsuliyyəti nəzərdə tutur. Həmin maddəyə əsasən, rəisin və ya vəzifəli şəxsin öz xidməti borcuna səhlənkar yanaşması ağır nəticələrə səbəb olduqda üç ildən yeddi ilədək müddətə azadlıqdan məhrumetmə ilə cəzalandırılır.
