Dövlət satınalmaları: qanunda nə dəyişdi?
Prezident İlham Əliyev “Dövlət satınalmaları haqqında” qanuna dəyişiklikləri imzalayıb. Novator.az bildirir ki, əsas yeniliyə görə, birinci instansiya məhkəmələrində kargüzarlıq üçün dəftərxana ləvazimatlarının satın alınmasına dövlət büdcəsində nəzərdə tutulmuş vəsait birbaşa hakimlərin bank hesabına köçürüləcək. Vəsaitin bank hesablarına köçürülməsi qaydasını Nazirlər Kabineti müəyyən edəcək. İyulun 25-də verdiyi fərmanda prezident həmin qaydanı bir ay müddətində təsdiqləməyi tapşırıb.
“Dövlət satınalmaları haqqında” qanun Azərbaycanda dövlət müəssisə və təşkilatlarının (idarələrinin), nizamnamə fondunda dövlətin payı 30 faiz və daha çox olan müəssisə və təşkilatların malları (işləri və xidmətləri) dövlət vəsaitləri, dövlətin aldığı və dövlət zəmanəti ilə alınmış kreditlər və qrantlar hesabına satın almasına şamil edilir.
