Nazir cəbhə xəttində
Müdafiə naziri Zakir Həsənov iyulun 24-də cəbhə zonasına baş çəkib. Rəsmi məlumata görə, nazir bölmələrdən birinin şəxsi heyəti üçün inşa edilən yeni yaşayış kompleksinin açılışına qatılıb, əsgər yataqxanası, tibb məntəqəsi, döyüş texnikası üçün saxlanc, avtopark, silah otağı, ideoloji otaq, məişət otağı, yeməkxana, hamam, əşya anbarı və digər xidməti otaqlara baxış keçirib.
Sonra müdafiə naziri qoşunların təmas xəttinə yaxın kəndə gedərək 2016-cı ilin aprel döyüşləri zamanı şəhid olmuş Orxan Həmidovun ailəsini ziyarət edib.
Həmin gün Zakir Həsənov hərbi hissələrin birində döyüş növbəsi çəkən şəxsi heyətlə görüşüb. Əməliyyat şəraiti barədə məruzədən sonra Zakir Həsənov bölmələrin döyüşə hazırlıq səviyyəsini yoxlayıb, düşmənin ön mövqelərini müşahidə edib.
