Müəllim olmaq istəyən 18,8 min nəfər seçildi
İyulun 25-i Təhsil Nazirliyində müəllimlərin işə qəbulu üzrə test imtahanlarının yekunu açıqlanıb. Nazir müavini Məhəbbət Vəliyeva jurnalistlərə deyib ki, 8-24 iyul arası müəllimlərin işə qəbulu müsabiqəsinin imtahan mərhələsi təşkil olunub: “Müsabiqədə iştirak üçün ümumilikdə 54 min 687 namizəd müraciət edib, onların 48 min 204-ü imtahana dəvət olunub. İmtahana 41 min 288 namizəd qatılıb. Bu mərhələnin ilkin nəticələrinə əsasən, imtahanda iştirak etmiş namizədlərdən 18 min 881 nəfər uğur qazanaraq müsabiqənin növbəti raunda vəsiqə qazanıb”.
Təhsil Nazirliyinin insan resursları şöbəsinin müdir müavini Murad Camalzadə bildirib ki, imtahanlar zamanı 19 ixtisas fənni, habelə metodika və məntiq üzrə ümumilikdə 5340 sualdan istifadə edilib.
İyulun 26-da namizədlərin şəxsi səhifəsinə yekun nəticə göndəriləcək.
İyulun 27-dən hər bir namizəd öz şəxsi səhifəsindən apellyasiya qaydasında müraciət edə bilər. Belə müraciətlər iyulun 29-dək qeydiyyata alınacaq.
Apellyasiya müraciətlərinə müvafiq ekspert komissiyaları baxacaq və nəticəsi barədə məlumat avqustun 6-dək namizədin şəxsi səhifəsinə göndəriləcək.
Müsabiqənin vakansiya seçimi mərhələsi avqustun 7-dən açıq elan ediləcək. Bu il müsabiqəyə ölkənin ümumi təhsil müəssisələrində ilkin olaraq təxminən 7000 vakant iş yerinin çıxarılması gözlənir.
