Məsələ Bakıya qaldı
UEFA-nın baş klub turniri olan Çempionlar Liqasında Azərbaycanı təmsil edən “Qarabağ” komandası ikinci mərhələnin ilk oyununu keçirib. Novator.az-ın məlumatına görə, iyulun 24-ü İrlandiyada yerli “Dandolk”la görüşən “Qarabağ” evə 1:1 hesabı ilə dönüb.
Cavab oyunu iyulun 31-i Bakıda keçiriləcək.
Üçüncü mərhələyə çıxsa, “Qarabağ” “Sutyeska” (Monteneqro) – APOEL (Kipr) cütlüyünün qalibinə rəqib olacaq. İlk oyunda kiprlilər üstün gəlib – 1:0.
Birinci raundda “Qarabağ” Albaniyanın “Partizani” klubunu yenib (2:0 və 0:0).
“Qarabağ”a dördüncü mərhələdə (20-28 avqust) İsveçrədən “Yanq Boyz”un, Çexiyadan “Slaviya”nın rəqib olması mümkündür.
17 sentyabr-11 dekabr arasında keçiriləcək qrup raunduna birbaşa vəsiqələri İspaniyanın “Barselona”, “Atletiko”, “Real”, “Valensiya”, İngiltərənin “Mançester Siti”, “Liverpul”, “Çelsi”, “Tottenhem”, İtaliyanın “Yuventus”, “Napoli”, “Atalanta”, “İnter”, Almaniyanın “Bavariya”, “Borussiya” (Dortmund), “Leypsiq”, “Bayer”, Fransanın PSJ, “Lill”, “Lion”, Rusiyanın “Zenit”, “Lokomotiv” (Moskva), Portuqaliyanın “Benfika”, Ukraynanın “Şaxtyor”, Belçikanın “Genk”, Türkiyənin “Qalatasaray”, Avstriyanın “Zalsburq” komandaları alıb.
