Dövlət Əməyin Mühafizəsi Fondu yaradılır
Əmək Məcəlləsinə dəyişiklik prezident İlham Əliyevin imzası ilə rəsmiləşib. Novator.az bildirir ki, əməyin mühafizəsi fondu məsələsini tənzimləyən 221-ci maddə yeni redaksiyada verilib.
Dəyişikliyə görə, Dövlət Əməyin Mühafizəsi Fondu müəssisələrin, vətəndaşların könüllü ödəmələri və başqa ödəmələr hesabına qurulur.
Dövlət Əməyin Mühafizəsi Fondunun idarə olunması və onun vəsaitlərindən istifadə edilməsi Nazirlər Kabinetinin təsdiqlədiyi əsasnamədə nəzərdə tutulan qaydada həyata keçirilir.
Əvvəlki varianta əsasən, Dövlət Əməyin Mühafizəsi Fondu həmçinin dövlət büdcəsindən ayırmalar; müəssisələrin mənfəətindən ayırmalar; əməyin mühafizəsi normalarını və qaydalarını pozan inzibati qaydada cəzalanmış vəzifəli şəxslərin ödədikləri cərimələrin qanunvericiliklə müəyyən edilmiş hissəsi hesabına təşkil edilə bilərdi.
İyulun 24-də imzaladığı sərəncamda prezident Nazirlər Kabinetinə Dövlət Əməyin Mühafizəsi Fondunu bir ay müddətində təsis etməyi tapşırıb.
