Qubad İbadoğlu görüşlər keçirib
ABŞ-a ezamiyyətini başa vuraraq ölkəyə qayıdan Azərbaycan Demokratiya və Rifah Hərəkatının sədri Qubad İbadoğlu Bakıda siyasi görüşlər keçirib.
1971-ci ildə anadan olan Qubad İbadoğlu iqtisadçı alim, İqtisadi Tədqiqatlar Mərkəzinin qurucusudur. Uzun illər Müsavat Partiyasının öncül şəxslərindən olub. Azərbaycan Demokratiya və Rifah Hərəkatını 2015-ci ildə yaradıb.
Novator.az-ın məlumatına görə, iyulun 24-də özünün “Facebook” səhifəsində açıqlama yayan Qubad İbadoğlu 14 ilə yaxın həbsdə olmuş keçmiş səhiyyə naziri Əli İnsanovla görüşdüyünü bildirib: “Əli müəllimlə görüş maraqlı oldu, onunla keçmişdən deyil, bu günün gerçəklərindən, sabahın perspektivlərindən doyunca söhbətləşdik”.
O, iyulun 23-də Azərbaycan Xalq Cəbhəsi Partiyasının sədri Əli Kərimli ilə də bir araya gəldiyini bəyan edib: “Hazırkı ictimai-siyasi və sosial-iqtisadi durumu dəyərləndirib gözlənən ssenarilər ətrafında fikir mübadiləsi apardıq”.
1946-cı il təvəllüdlü Əli İnsanov tibb elmləri doktorudur. Səhiyyə naziri postunu 1993-2005-ci illərdə tutub.
Hakim Yeni Azərbaycan Partiyasının qurucularındandır. 1995-2000-ci illərdə Milli Məclisin deputatı olub.
2005-ci ilin oktyabr ayında tutulub, iqtisadi cinayətlər ittihamı ilə 11 il müddətinə azadlıqdan məhrum edilib.
2016-cı ilin avqustunda Əli İnsanova yeni cinayət işi qaldırılıb və onun həbsi 2023-cü ilədək uzadılıb.
2019-cu il martın 16-da sabiq nazir əfv edilib.
1965-ci il təvəllüdlü Əli Kərimli AXC hakimiyyəti zamanı (1992-1993) əvvəlcə Prezident Aparatında şöbə müdiri, sonra dövlət katibi vəzifəsində çalışıb. 1993-cü ildən AXC sədrinin siyasi məsələlər üzrə müavini, daha sonra AXCP sədrinin birinci müavini olub. 1995 və 2000-ci illərdə Milli Məclisin deputatı seçilib. 2001-ci ildən AXCP sədridir.
