Hakimlərin maaşı necə artır?
Prezident İlham Əliyev “Məhkəmələr və hakimlər haqqında” qanuna dəyişiklikləri imzalayıb. Novator.az-ın məlumatına görə, 2019-cu il sentyabrın 1-dən qüvvəyə minəcək yenilik Ali Məhkəmənin sədrinin aylıq vəzifə maaşını (indi 2280 manatdır) Milli Məclis sədrinin aylıq vəzifə maaşına bərabərləşdirir. Milli Məclisin sədri 2475 manat maaş alır.
Digər hakimlərin maaşı Ali Məhkəmə sədrinin əməkhaqqının 70-90 faizi həcmindədir.
Başqa bir dəyişikliyə əsasən, hakimlərə bir aylıq vəzifə maaşı həcmində əlavə vəsait ödənəcək, həmçinin onlar səlahiyyətlərin yerinə yetirilməsi ilə bağlı xərclərin ödənməsi üçün vəzifə maaşının 25 faizi miqdarında vergidən azad olunan aylıq alacaqlar.
Hakimlərə məzuniyyətə çıxdığı vaxt məzuniyyət haqqı və iki aylıq əməkhaqqı məbləğində müavinət verilməsi də rəsmiləşib. Məzuniyyət haqqının hesablanması qaydasını Nazirlər Kabineti təsdiqləməlidir. Qanunun tətbiqi ilə bağlı 23 iyul fərmanında prezident bu məsələnin həlli üçün Nazirlər Kabinetinə üç ay vaxt qoyub.
