Erməni əsgərin özünü öldürdüyü açıqlandı
Ermənistanın İstintaq Komitəsi Azərbaycanın Qarabağ bölgəsində həlak olmuş əsgər Volodya Qaloyan haqqında rəsmi məlumat yayıb. Bildirilir ki, Volodya Qaloyan iyulun 23-ü saat 22:55-də postda starşinanı öldürmək istəyib. Starşinaya avtomatla atəş açan əsgər onu öldürə bilməyib və silahını götürərək postdan qaçıb.
Novator.az-ın məlumatına görə, İstintaq Komitəsi əsgərin meyitinin iyulun 24-ü saat 04:20-də postdan 50 metr aralıda tapıldığını açıqlayıb. Onun özünü güllələdiyi xəbər verilir.
Cinayət işi adam öldürməyə cəhd və özünü öldürmək həddinə çatdırmaq motivləri ilə araşdırılır.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Ermənistan Dağlıq Qarabağı (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) ələ keçirib.
