Avroda beşinci ucuzlaşma
İyulun 24-də avronun rəsmi kursu 1 manat 90 qəpikdən aşağı düşüb. Mərkəzi Bank bu valyutanı 1,8947 manata təklif edir. Avro bu il 25-29 aprel arası, mayın 3-də, 20-24 və 29-31 may arası 1 manat 90 qəpikdən ucuz satılıb.
Nağdsız dövriyyəyə 1999-cu ildə buraxılan avro 2002-ci ildən real pul vahidi kimi işlədilir. Zonaya Almaniya, Andorra, Avstriya, Belçika, Estoniya, Finlandiya, Fransa, İrlandiya, İspaniya, İtaliya, Kipr, Latviya, Litva, Lüksemburq, Malta, Monako, Niderland, Portuqaliya, San Marino, Slovakiya, Sloveniya, Vatikan və Yunanıstan daxildir.
Avro 2019-cu ilə 1,9323 manatla başlayıb. Yanvarda yuxarı rəsmi kurs 1,9647, fevralda 1,9452, martda 1,9337, apreldə 1,9225, mayda 1,9107, iyunda 1,9396 manat olub.
Novator.az-ın məlumatına görə, iyulun 24-də ABŞ dollarına 1,7, Gürcüstan larisinə 0,5851, Rusiya rubluna 0,0269, Türkiyə lirəsinə 0,2973 manat qiymət qoyulub (Valyutalar).
Dolların indiki qiyməti 2018-ci il martın 7-dən qüvvədədir. Lari 2019-cu ilə 0,6346, rubl 0,0245, lirə 0,3141 manatla başlayıb.
Dövlət Neft Fondu Mərkəzi Bankın manatı qorumaq üçün yanvar-iyun aylarında keçirdiyi valyuta hərraclarında 2 milyard 643,6 milyon ABŞ dolları məbləğində vəsait satıb.
