Prezident qəzetlərə əlavə vəsait ayırdı
İyulun 22-də prezident İlham Əliyev Azərbaycanda nəşr olunan qəzetlərin maddi-texniki bazasının gücləndirilməsinə sərəncam verib. Sərəncama əsasən, qəzetlərə əlavə maliyyə yardımı göstərmək üçün 2019-cu ilin dövlət büdcəsindən, prezidentin ehtiyat fondundan Kütləvi İnformasiya Vasitələrinin İnkişafına Dövlət Dəstəyi Fonduna 1 milyon manat ayrılır.
Kütləvi İnformasiya Vasitələrinin İnkişafına Dövlət Dəstəyi Fondu 2009-cu il aprelin 3-də yaradılıb. Həmin il mayın 22-dən quruma Vüqar Səfərli icraçı direktorluq edir.
2019-cu ilin dövlət büdcəsində Kütləvi İnformasiya Vasitələrinin İnkişafına Dövlət Dəstəyi Fondu üçün 4 milyon 62,9 min manat nəzərdə tutulub. Fond hazırda “Bakı xəbər”, “Kaspi”, “Yeni Müsavat”, “Səs”, “Yeni Azərbaycan”, “Mövqe”, “Kaspiy” qəzetlərinə ayda 20 min manat; “Həftə içi”, “Novoye vremya”, “Azernews”, “525-ci qəzet”, “Xalq Cəbhəsi”, “Paralel”, “Hürriyyət”, “Olaylar”, “Palitra”, “Ədalət”, “Üç nöqtə”, “Azad Azərbaycan”, “Şərq” qəzetlərinə ayda 10 min manat; “Oxu məni”, “Unikal”, “Hərbi and”, “Türküstan”, “The Business Times” qəzetlərinə ayda 5 min manat maliyyə yardımı ayırır.
1875-ci il iyulun 22-də Azərbaycanın ilk milli qəzeti olan “Əkinçi” qəzetinin birinci nömrəsi çapdan çıxıb. 1991-ci ildən həmin gün Azərbaycan Jurnalistikası Günü kimi qeyd olunur.
