Yeni attaşe təqdim olunub
İyulun 19-da müdafiə naziri Zakir Həsənov ABŞ-ın Azərbaycandakı səfiri Li Litzenberqerlə görüşüb. Rəsmi məlumata görə, regiondakı hərbi-siyasi vəziyyətə toxunan nazir Ermənistanın işğalçılıq siyasətinin davam etdiyini, ATƏT-in Minsk qrupu həmsədrlərinin Dağlıq Qarabağ münaqişəsinin həlli ilə bağlı səylərinə baxmayaraq Yerevanın sülh danışıqlarını qəsdən yubatdığını vurğulayıb.
Li Litzenberqer ABŞ-ın Azərbaycanın ərazi bütövlüyünü tanıdığını və ölkəsinin Dağlıq Qarabağ münaqişəsinin dinc həllinin tərəfdarı olduğunu deyib.
Görüşdə regional və ikitərəfli əməkdaşlıq, Xəzər dənizi və mühüm enerji infrastrukturlarının təhlükəsizliyi, kütləvi qırğın silahlarının yayılmasına qarşı mübarizə, hər iki ölkənin hərbi təhsil üzrə mütəxəssislərinin qarşılıqlı səfərləri, həmçinin maraq doğuran digər məsələlər müzakirə olunub.
Səfir ABŞ-ın Azərbaycana yeni təyin olunan hərbi attaşesi polkovnik Terri Həmriki müdafiə nazirinə təqdim edib.
