Sədrlik var, 12-ci sədr yox
“Azərbaycan Televiziya və Radio Verilişləri” Qapalı Səhmdar Cəmiyyətinin sədri vəzifəsi bu il yanvarın 15-dən boşdur. Prezident həmin gün Arif Alışanovu QSC-nin sədri vəzifəsindən azad edib. Arif Alışanov sədr postunu 2006-cı ildən tuturdu.
Novator.az bildirir ki, Azərbaycan Televiziyası 1956-cı ildə Mədəniyyət Nazirliyinin tabeliyində Bakı Televiziya Studiyası adı ilə fəaliyyətə başlayıb.
1957-ci ildən Nazirlər Soveti yanında Dövlət Radio və Televiziya Verilişləri Komitəsi adı daşıyıb.
1970-ci ildə Dövlət Televiziya və Radio Verilişləri Komitəsi statusu alıb, 1991-ci ildə eyni adda şirkətə çevrilib.
2005-ci ildən indiki adı ilə fəaliyyət göstərir.
Arif Alışanova qədər Azteleradionun 10 rəhbəri olub.
1956-cı ildə Bakı Televiziya Studiyasına Ənvər Əlibəyli rəhbərlik edib.
1957-ci ildə Teymur Əliyev yeni yaradılan Dövlət Radio və Televiziya Verilişləri Komitəsinə sədr təyin olunub.
1965-ci ildə komitənin sədri postunu Ənvər Əlibəyli tutub.
1969-cu ildən sədr İmran Mirzəyev olub.
1970-ci ildə Dövlət Televiziya və Radio Verilişləri Komitəsi adlandırılan qurumun sədri vəzifəsinə Qurban Yusifzadə təyin edilib.
1983-1990-cı illərdə komitəyə Elşad Quliyev sədrlik edib. 1992-ci ilin martında Elşad Quliyev yenidən sədr təyin olunub, iki ay sonra postunu itirib.
1990-cı ildən sədr postunu Qeysər Xəlilov tutub.
1991-ci ildən 1992-ci ilin mart ayınadək Dövlət Televiziya və Radio Verilişləri Şirkətinə Məmməd Murad rəhbərlik edib. O, 1992-ci il mayın 14-də şirkət rəhbərliyinə qaytarılıb, amma bir neçə gün sonra Məmməd İsmayılla əvəzlənib.
1993-cü ildən şirkətin sədri postunu Babək Hüseynoğlu tutub.
1996-cı ildən Nizami Xudiyev sədr olub.
Hazırda Azteleradioya Rövşən Məmmədov müvəqqəti rəhbərlik edir.
Rövşən Məmmədov 1979-cu ildə Ağstafa rayonunda doğulub. Bakı Dövlət Universitetinin jurnalistika fakültəsinin bakalavr və magistratura pillələrini bitirib.
2006-cı ildə Bakı Dövlət Universitetində fəlsəfə doktoru elmi dərəcəsi, 2016-cı ildə Bakı Slavyan Universitetində filologiya elmləri doktoru elmi dərəcəsi alıb. 3 kitabın, 40-dan çox elmi məqalənin müəllifidir. Dövlət İdarəçilik Akademiyasında pedaqoji fəaliyyətlə məşğul olur.
Rövşən Məmmədov uzun müddət “Lider” televiziyasında müxtəlif vəzifələrdə çalışıb, idman redaksiyasına rəhbərlik edib.
2015-ci ildən Azərbaycan Televiziyasında “Günün nəbzi”, “Əsas məsələ” və “Həftə” verilişlərinin aparıcısı olub, sonra “Azərbaycan Televiziyası və Radio Verilişləri” QSC-nin ictimai-siyasi proqramlar və xarici xəbərlər studiyasının direktoru vəzifəsinə təyinat alıb.
15 yanvar 2019-cu ildən sədr müavini və sədr vəzifəsinin icraçısıdır.
