Naxçıvanın iqtisadi göstəriciləri
2019-cu ilin yanvar-iyun aylarında Naxçıvan Muxtar Respublikasında ümumi daxili məhsul (ÜDM) istehsalı 1 milyard 279,6 milyon manatı ötüb. Bu, bir il öncəki göstəricidən 1,4 faiz çoxdur. Xəbəri muxtar respublikanın Dövlət Statistika Komitəsinə istinadla AZƏRTAC yayıb.
Hesabata görə, hər bir nəfərə ÜDM 2801 manatdan çoxdur. ÜDM-in tərkibində ilk yeri 29,9 faizlik payla sənaye sahəsi tutub.
2018-ci ilin ilk yarısı ilə müqayisədə sənaye məhsulunun 1,4 faiz, əsas kapitala yönəldilən vəsaitlərin 1,2 faiz, kənd təsərrüfatı məhsulunun 2,8 faiz, nəqliyyat sektorunda yük daşınmasının 2,3 faiz, informasiya və rabitə xidmətlərinin 3,9 faiz artdığı vurğulanır.
Yarım ildə Naxçıvan Muxtar Respublikasında 550,1 milyon manat dəyərində sənaye məhsulu istehsal olunub. İstehsal olunan sənaye məhsulunda özəl bölmənin payı 94,3 faiz təşkil edib.
