Meriya yürüş-mitinqlə bağlı müraciətə cavab verib
Bakı Şəhər İcra Hakimiyyəti Azərbaycan Xalq Hərəkatının iyulun 20-si paytaxtda keçirmək istədiyi yürüş-mitinqə razılıq verməyib.
Xalq Hərəkatı “Amay” Ticarət Mərkəzinin yanından Xətai Rayon İcra Hakimiyyətinin binasınadək yürüş, icra hakimiyyətinin binası yaxınlığında isə mitinq keçirmək istəyirdi. Aksiyanın əsas şüarı belə olacaqdı: “Qarabağa azadlıq!”
Ancaq meriya hərəkatın aksiya ilə bağlı müraciətinə cavab olaraq bildirib ki, hakimiyyət Azərbaycanın ərazi bütövlüyünün bərpası üçün ölkə daxilində və beynəlxalq miqyasda ciddi iş apardığı və aksiyalar zamanı yollarda tıxac yarandığı üçün mitinqin keçirilməsi məqsədəuyğun hesab edilmir.
Azərbaycan Xalq Hərəkatı 2019-cu il yanvarın 26-da keçmiş daxili işlər naziri İsgəndər Həmidovun təşəbbüsü ilə təsis edilib.
