Köçəryanın mühakiməsi niyə dayandı?
Ermənistanın Konstitusiya Məhkəməsi sabiq prezident Robert Köçəryanın mühakiməsini dayandırıb. Novator.az-ın məlumatına görə, qərar iyulun 18-də qəbul olunub.
Paytaxt Yerevanın Avan və Nor Nork rayonlarına aid ümumi məhkəmə və sabiq prezident Cinayət Məcəlləsinin 300.1-ci maddəsinin ölkə konstitusiyasına uyğunluğunun araşdırılmasını istəyiblər.
300.1-ci maddə konstitusiya quruluşunun zorla dəyişdirilməsinə görə məsuliyyəti nəzərdə tutur. Robert Köçəryana əsas ittiham həmin maddə ilə verilib.
Konstitusiya Məhkəməsinin qərarına əsasən, 300.1-ci maddənin ölkə konstitusiyasına uyğunluğuna Avropa İnsan Hüquqları Məhkəməsi və Avropa Şurasının Venesiya Komissiyası rəy verməlidir. Həmin müddətə qədər cinayət işi üzrə mühakimə dayandırılır.
Robert Köçəryan işğalçı Qarabağ müharibəsinin rəhbərlərindən biridir. 1992-ci ildən Dağlıq Qarabağdakı separatçı rejimin başçısı, 1997-ci ildən Ermənistanın baş naziri, 1998-ci ildən prezidenti olub.
2008-ci il fevralın 19-da keçirilmiş prezident seçkisində hakimiyyət onun varisi Serj Sərkisyana ötürülüb. Müxaliflər paytaxt Yerevanda seçkinin rəsmi nəticələrinə davamlı etiraz aksiyaları keçiriblər. Martın 1-də aksiyalar hərbi güclə dağıdılıb, 8 mülki şəxs, 2 polis əməkdaşı həlak olub.
2018-ci ildə hakimiyyətə Nikol Paşinyan gəldikdən sonra bu iş üzrə istintaq yenilənib.
Xüsusi İstintaq Xidməti Robert Köçəryanı 1 mart 2008-ci il qırğınının istintaqına cəlb edib, ötən il iyulun 26-da ona cinayət işi qaldırıb. Sabiq prezident dövlətin konstitusiya quruluşunu zorla dəyişdirmədə ittiham edilir.
Yerevanın Şenqavit rayonundakı ümumi məhkəmə iyulun 27-də Robert Köçəryanın 2 ay müddətinə həbsinə qərar verib, avqustun 13-də apellyasiya instansiyası toxunulmazlıq hüququnu əsas gətirib sabiq prezidenti azadlığa buraxıb. Kassasiya Məhkəməsi Baş Prokurorluğun etirazını nəzərə alaraq noyabrın 15-də işi yenidən baxılmaq üçün apellyasiya instansiyasına göndərib, Ermənistanın Apellyasiya Məhkəməsi dekabrın 7-də Robert Köçəryanın həbsinə qərar verib.
Robert Köçəryan xüsusilə külli miqdarda rüşvət almaqda da günahlandırılır. Bu ittiham iş adamı Silva Ambarsumyanın ərizəsi əsasında verilib. Silva Ambarsumyan iddia edir ki, Robert Köçəryan 2008-ci ildə prezident postunu tutarkən bir biznes müqaviləsinə mane olmamaq üçün ondan külli miqdarda rüşvət alıb.
2019-cu il mayın 13-dən Yerevanın Avan və Nor Nork rayonlarına aid ümumi məhkəmədə bu iş üzrə proses başlayıb. Robert Köçəryanla birgə general-polkovniklər Seyran Ohanyan, Yuri Xaçaturov və baş nazirin keçmiş müavini Armen Gevorkyan mühakimə olunur.
Mayın 18-də Avan və Nor Nork məhkəməsi pul girovu müqabilində Robert Köçəryanı azadlığa buraxıb, mayın 20-də isə məhkəmə prosesi dayandırılıb, iş rəy üçün Konstitusiya Məhkəməsinə göndərilib.
İyunun 25-də Apellyasiya Məhkəməsi Baş Prokurorluğun Robert Köçəryanın azadlığa buraxılması və mühakimənin dayandırılması qərarlarından şikayətlərini təmin edib, Avan və Nor Nork rayonlarına aid ümumi məhkəmənin hər iki qərarı ləğv olunub.
Apellyasiya Məhkəməsinin qərarından dərhal sonra Robert Köçəryan yenidən həbs edilib.
Şamaxılı erməni general axtarışa verildi
Köçəryan istintaqı məntiqsizlikdə günahlandırdı
Yuri Xaçaturova da iş qaldırıldı
Köçəryanın ölkədən çıxması yasaqlandı
Moskvadan Yerevana növbəti təzyiq
Köçəryanın azadlığa çıxması düyünə düşdü
Köçəryanla bağlı qərar yanvarın 18-də veriləcək
Köçəryanın həbs müddəti uzadılıb
Köçəryan tərəfdarlarına müraciət edib
Köçəryanın cinayət işi böyüyür
Köçəryan və başqaları nədə ittiham olunur?
Köçəryanın həbs müddəti uzadıldı
Köçəryan və başqalarının işi məhkəməyə getdi
Köçəryanın mühakiməsi dayandırılıb
Köçəryan yenə həbs oluna bilər
Məhkəmə Köçəryanla bağlı şikayətə baxacaq
