Elmar ziyarəti
Müsavat Partiyasının rəhbərliyi iyulun 18-i Bakıdakı Qurd qapısı qəbiristanlığına baş çəkərək mərhum jurnalist Elmar Hüseynovu məzarı başında anıb. Ziyarətdə başqan Arif Hacılı və sabiq başqan İsa Qəmbər çıxış ediblər. Qeyd olunub ki, Elmar Hüseynov həyatını azadlıq ideallarına qurban verib və qətlə yetirilsə də, onun ruhu mücadiləni davam etdirir.
Elmar Hüseynov 2005-ci il martın 2-də Bakıda odlu silahla qətlə yetirilib.
İstintaq işini 10 ildən çox Milli Təhlükəsizlik Nazirliyi araşdırıb. Qətldən az sonra Azərbaycanın hüquq mühafizə orqanları cinayətdə şübhəli bilinən şəxslərdən ikisinin adını açıqlayıb: Gürcüstan vətəndaşları Teymuraz Əliyev və Tahir Xubanov. İndiyədək onlar tapılmayıblar.
1967-ci il iyulun 17-si Bakıda anadan olan Elmar Hüseynov jurnalistikaya 1990-cı illərin əvvəllərində gəlib. Bir neçə rusdilli media quruluşunda çalışan Elmar Hüseynov sonra “Monitor” jurnalını təsis edib, öldürülənədək onun baş redaktoru olub.
