Əsgər yaralanıb. General-polkovnik hadisə yerinə yollanıb
Dövlət Sərhəd Xidmətinin mətbuat mərkəzi məlumat yayıb.
Məlumatda deyilir ki, iyulun 18-nə keçə gecə (saat 00:20 radələrində) Ermənistan Silahlı Qüvvələrinin bölmələri Ermənistanın Noyemberyan rayonunun Zorakan kəndi istiqamətindən iri çaplı silahlardan atəş açmaqla atəşkəs rejimini pozub. Onlar Qazax rayonunun II Şıxlı kəndi yaxınlığındakı sərhəd döyüş məntəqəsinin mövqelərini atəşə tutublar. Cavab atəşi ilə düşmən susdurulub.
Hadisə zamanı Dövlət Sərhəd Xidmətinin Sərhəd Qoşunlarının “Qazax” sərhəd dəstəsinin sərhəd döyüş məntəqəsində döyüş növbəsində xidmət aparan əsgər Ceyhun Bayramov yaralanıb. Sərhədçi əsgərə dərhal tibbi yardım göstərilib. Hazırda onun həyatına təhlükə yoxdur.
Dövlət Sərhəd Xidmətinin rəisi general-polkovnik Elçin Quliyev hadisə yerində olub, sərhəd döyüş məntəqəsinin şəxsi heyəti ilə görüşüb, xidməti-döyüş fəaliyyətinin daha da gücləndirilməsi üçün tapşırıqlar verib.
