Avropa İttifaqının yeni rəhbərləri
Novator.az Avropa İttifaqının yeni rəhbərlərini təqdim edir.
1957-ci ildə yaradılan Avropa İttifaqı hazırda 28 ölkəni bir araya gətirir: Almaniya, Avstriya, Belçika, Bolqarıstan, Böyük Britaniya, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Böyük Britaniya qurumdan çıxmaq üzrədir.
Bu il mayın 23-dən 26-dək ittifaqın qanunverici orqanına – 751 nəfərlik Avropa Parlamentinə yeni seçki keçirilib. İyulun 3-də italyan David-Mariya Sassoli Avropa Parlamentinin sədri seçilib. Əvvəlki heyətdə də sədr postunda italyan əyləşirdi – Antonio Tayani.
David-Mariya Sassoli 1956-cı ildə doğulub. Jurnalist və siyasətçidir. Avropa Parlamentinə ilk dəfə 2009-cu ildə seçilib. 2014-cü ildən parlament sədrinin müavini olub.
Avropa İttifaqı Şurasına hazırda polyak Donald Tusk sədrlik edir. İyulun 2-də şura bu vəzifəyə belçikalı Şarl Mişeli seçib. O, dekabrın 1-də səlahiyyətlərinin icrasına başlayacaq.
Şarl Mişel 1975-ci ildə doğulub. Belçika hökumətində inkişaf və əməkdaşlıq naziri postunu tutub. 2014-cü ildən ölkənin baş naziridir.
Avropa İttifaqının icra orqanına – Avropa Komissiyasına lüksemburqlu Jan-Klod Yunker rəhbərlik edir. İyulun 16-da Avropa Parlamenti bu posta alman Ursula fon der Lyayeni təsdiqləyib. O, səlahiyyətlərinin icrasına noyabrın 1-də başlayacaq.
Ursula fon der Lyayen 1958-ci ildə doğulub. Almaniya hökumətində ailə naziri, əmək və sosial məsələlər naziri postlarını tutub. 2013-cü ildən 2019-cu ilədək müdafiə naziri olub.
