İsgəndər Həmidov xəstəxanaya yerləşdirilib
Sabiq daxili işlər naziri İsgəndər Həmidov Şamaxıda xəstəxanaya yerləşdirilib. Məlumatı iyulun 17-də Novator.az-a sabiq nazirin qohumu verib. Onun sözlərinə görə, Şamaxıda istirahət edən İsgəndər Həmidovun səhhətində müəyyən gərginlik yarandığından həkimlər xəstəxana şəraitində müayinə və müalicəni məsləhət görüb.
Ürək xəstəliyindən əziyyət çəkən İsgəndər Həmidov 2018-ci ilin dekabrında Bakıda Tibb Universitetinin Tədris Cərrahiyyə Klinikasında, sonra ev şəraitində müalicə alıb. Sabiq nazir bu il mayın 20-dən Türkiyənin İstanbul şəhərində müayinə və müalicə kursu keçib. İyunun 8-də Bakıya dönən İsgəndər Həmidov bir müddət sonra həkimlərin məsləhəti ilə Şamaxıya yollanıb.
İsgəndər Həmidov 1948-ci ildə Kəlbəcərin Bağlıpəyə kəndində doğulub. İqtisadiyyat və hüquq sahələri üzrə iki ali təhsil alıb. Uzun illər daxili işlər orqanlarında xidmət edib. Milli azadlıq hərəkatının öncül şəxslərindəndir. 1990-cı ildən parlamentin üzvü olub. 1992-1993-cü illərdə Azərbaycanın daxili işlər naziri postunu tutub. 1995-2003-cü illərdə həbsdə yatıb.
İsgəndər Həmidov bu il yanvarın 26-sı Bakıda təsis olunan Azərbaycan Xalq Hərəkatı adlı müxalif blokun liderlərindəndir.
