Büdcədə yarım milyard manatdan çox kəsir var
2019-cu ilin yeni makroiqtisadi göstəriciləri açıqlanıb. Novator.az-ın məlumatına görə, Dövlət Statistika Komitəsi bildirir ki, ilin ilk yarısında ümumi daxili məhsul əvvəlki ilin müvafiq dövrü ilə müqayisədə 2,4 faiz, sənaye istehsalı 1,8 faiz, kənd təsərrüfatının ümumi məhsulu 13 faiz artıb.
Hesabata əsasən, əsas kapitala vəsait qoyuluşu 5,4 faiz azalıb.
Nəqliyyat sektorunda yük daşınmasının 1,6 faiz, sərnişin daşınmasının 1,5 faiz yüksəldiyi vurğulanır.
İnformasiya və rabitə xidmətlərinin həcmi dəyər ifadəsində 15,8 faiz artıb, bu sahədə əldə edilmiş gəlirin 82,5 faizi qeyri-dövlət sektorunun payına düşüb.
6 ayda ictimai iaşə dövriyyəsi real ifadədə 3,6 faiz, əhaliyə göstərilən ödənişli xidmətlərin dəyəri real ifadədə 1,5 faiz artıb.
Yanvar-iyun aylarında əhalinin gəlirləri nominal ifadədə 6,6 faiz artaraq 27,4 milyard manata çatıb.
Yarım ildə dövlət büdcəsinə 10 milyard 405,5 milyon manat vəsait daxil olub, büdcədən 10 milyard 951 milyon manat vəsait xərclənib, büdcənin icrasında 545,5 milyon manatlıq kəsir yaranıb.
Mərkəzi Bank iyun ayının 1-nə ölkənin bank və digər kredit təşkilatlarının kredit portfelini milli valyuta ekvivalentində 13 milyard 198 milyon manat göstərib. Ödəmə vaxtı keçmiş kreditlərin məbləği ümumi kredit portfelinin 11,3 faizini təşkil edib.
Əhalinin banklardakı əmanətlərinin milli valyuta ekvivalentində məbləği 8 milyard 622,9 milyon manat olub.
