Seçki xərci: prezident partiyası liderdir
Ukraynada iyulun 21-nə təyin olunmuş parlament seçkisi ilə bağlı yeni rəqəmlər açıqlanıb.
Qanun 450 yerlik parlamentin 225 deputatının majoritar üsulla (dairələrdən), 225 deputatının proporsional sistemlə (partiya siyahıları üzrə) seçilməsini hökm edir. Ancaq ərazilərin bir hissəsi işğal edildiyi üçün seçki 199 dairədə təşkil olunacaq.
Novator.az bildirir ki, Mərkəzi Seçki Komissiyasının yeni hesabatına görə, dairələrdən ümumilikdə 3082 namizəd var.
Proporsional sistem üzrə 22 partiya yarışır. Onların birlikdə 568 milyon qrivnadan çox təşviqat vəsaiti topladığı qeyd olunur (1 Ukrayna qrivnası 6 qəpikdir).
Prezident Vladimir Zelenskini dəstəkləyən Xalq Xidmətçisi Partiyasının indiyədək seçkiyə 96,9 milyon qrivna xərclədiyi vurğulanır.
Radikal Partiya 73 milyon qrivna xərclə ikinci, Səs Partiyası 71,6 milyon qrivna xərclə üçüncüdür.
Ukrayna Strategiyası Partiyasının seçkiyə 61,2 milyon qrivna, Müxalif Blokun 55 milyon qrivna, Avropa Həmrəyliyi Partiyasının 47,2 milyon qrivna, Batkivşina Partiyasının 35 milyon qrivna, Vətəndaş Mövqeyi Partiyasının 21 milyon qrivna, Güc və Şərəf Partiyasının 18,4 milyon qrivna, Samopomoş Partiyasının 15,2 milyon qrivna xərci çıxıb.
