Şəkidə xəsarət almış şəxslərin 4-ü Bakıya gətirilib
İyulun 14-ü gündüz saat 12 radələrində Şəki Xan Sarayının qarşısında çinar ağacının iki böyük budağı güclü küləyin təsirindən qırılaraq yerə düşüb. Hadisədə 19 nəfər xəsarət alıb. Onların 12-si Azərbaycan, 5-i Suriya, 2-si Rusiya vətəndaşıdır.
Xəsarət alanların hamısı Şəki Mərkəzi Rayon Xəstəxanasına yerləşdirilib. 4 nəfərin səhhəti ağır olduğundan onlar paytaxta göndərilib.
AZƏRTAC-a danışan Dövlət Turizm Agentliyinin sədri Fuad Nağıyev deyib ki, xəsarət alan şəxslərin sağlıq durumu prezident İlham Əliyevin xüsusi nəzarətindədir.
Səhiyyə Nazirliyinin 15 iyul açıqlamasına görə, Şəki Mərkəzi Rayon Xəstəxanasında müalicəsi davam edən Xatirə Ağamalıyevanın (sağ baldır sümüyünün çox qəlpəli sınığı, travmatik şok) vəziyyəti ağırdır.
Digər yaralı Elxan Məmmədovun (onurğanın qapalı travması) vəziyyətinin orta ağır olduğu vurğulanır.
Bakıdakı 1 saylı Kliniki Tibbi Mərkəzdə olan İlkin Məmmədovun (ağır dərəcəli kəllə beyin travması, sağ ayaqda sınıq), Sara Həsənin (çanaqda sağ bud sümüyünün qapalı travması), Farik Həsənin (sol incik sümüyünün sınığı), Əl-Həsən Samirənin (sağ baldır sümüyünün yerdəyişən sınığı) vəziyyətlərinin ağır sabit olduğu bildirilir.
