Neftsiz və qazsız ixrac nə qədər artıb?
Dövlət Statistika Komitəsi xarici ticarət əlaqələri haqqında hesabat yayıb. Novator.az bildirir ki, rəsmi açıqlamaya görə, 2019-cu ilin yanvar-may aylarında Azərbaycanın hüquqi və fiziki şəxsləri 174 ölkədəki tərəfdaşları ilə ticarət əməliyyatları həyata keçirib, 102 ölkəyə məhsul ixrac olunub, 163 ölkədən idxal rəsmiləşib.
Beş ayda ölkənin xarici ticarət dövriyyəsi 14 milyard 74,2 milyon ABŞ dolları, o cümlədən ixracın dəyəri 8 milyard 240 milyon dollar, idxalın dəyəri 5 milyard 834,2 milyon dollar təşkil edib. 2018-ci ilin yanvar-may ayları ilə müqayisədə xarici ticarət dövriyyəsi faktiki qiymətlərlə 16,5 faiz, o cümlədən idxal 51,3 faiz, ixrac 0,1 faiz artıb. Real ifadədə dövriyyənin 6,8 faiz, o cümlədən idxalın 20,4 faiz, ixracın 0,4 faiz artdığı vurğulanır.
Yanvar-may aylarında ölkədən 786,6 milyon dollar dəyərində qeyri neft-qaz məhsulları ixrac edilib, bu da 2018-ci ilin yanvar-may aylarına nisbətən faktiki qiymətlərlə 17,8 faiz, real ifadədə isə 12,6 faiz çoxdur.
