Baş Prokurorluğun Şəki olayı ilə bağlı rəsmi məlumatı
Baş Prokurorluğun mətbuat xidməti iyulun 15-də rəsmi məlumat yayıb. Qeyd olunur ki, iyulun 14-ü saat 12 radələrində Şəki Xan Sarayı abidəsinin ərazisində ağacın budaqlarının qəflətən qırılaraq insanların üzərinə düşməsi nəticəsində 19 nəfər müxtəlif dərəcəli bədən xəsarətləri alıb: “Onlar dərhal Şəki Mərkəzi Rayon Xəstəxanasına yerləşdirilib. 13 nəfər ilkin tibbi yardımdan sonra evə buraxılıb, 2 nəfərin Şəkidə, 4 nəfərin isə Bakıda intensiv müalicələri davam etdirilir.
Aparılmış ilkin araşdırmalarla müəyyən edilib ki, hündürlüyü 34 metr olan Xan çinarının 21 metr hündürlükdə yerləşən 0,5 metr diametrli budağı qəflətən qoparaq aşağıda – 17 metr hündürlükdə olan nisbətən kiçik diametrli budağı da qırıb, hər iki budaq insanların üzərinə düşüb.
Mütəxəssislərin ilkin rəyinə əsasən, budaqların qırılması əlverişsiz hava şəraitinin nəticəsidir. İyulun 12-dən başlayaraq saniyədə 8-12 metr olan küləklə müşayiət olunan, xüsusilə iyulun 14-ü səhərdən başlayaraq 3 saat ərzində aylıq normanın 54 faizi miqdarında aramsız yağış yağıb.
Qırılmış əsas budaq sağlam olub, qurumağa və hansısa fiziki təsirlərə məruz qalmayıb. Həmin budaqlarda virus və ya bakterioloji proseslərin gedib-getməməsinin müəyyən edilməsi üçün Ekologiya və Təbii Sərvətlər Nazirliyinin mütəxəssisləri cəlb olunmaqla ekspertizalar təyin edilib. Ekspertizaların keçirilməsi Ədliyyə Nazirliyinin Məhkəmə Ekspertizası Mərkəzinə həvalə olunub. Hazırda araşdırmalar davam etdirilir”.
